每逄聖誕，女神嘅數目就會忽然曝升，大家都會著得靚靚咁係商場佈置自拍同影女神相。今年華麗嘅城堡空降屯門市廣場，各位女神仲唔快啲去睇下會唔會邂逅心愛嘅王子！係夢幻嘅世界入面我依莉詩亦瞬間變花痴呢！
6位公主旁瘋狂自拍
城堡入面，王子就見唔到啦，反而就見到 6位迪士尼公主盛裝打扮，準備參加聖誕舞會。小魚仙艾莉奧以人類形態現身，準備來一場人魚之戀；灰姑娘同樣著咗對啱 size 帶又會甩嘅玻璃鞋趕到現場；爛睡嘅睡公主起身化好靚妝等待；貝兒撇甩野獸男友單拖出席；長髮公主樂佩一早起身吹靚個頭見人；就連收咗 7隻兵嘅白雪公主都加入戰團。睇嚟今次係一場惡鬥呢！各位女神又有無信心獲得王子歡心呢？
▲ 呢個 充滿夢幻色彩嘅城堡唔單止係戰場，更加係一個公主培訓場，指定期間會有「故事分享時間」，夢想成為公主嘅小女孩就要聽聽公主們嘅故事，從中好好學習冧王子秘笈啦！
▲ 貝兒（Belle）撇甩野獸男友單拖出席。
▲ 收咗 7隻兵嘅白雪公主（Snow White）嫌未夠，都要加入戰團。
▲ 小魚仙艾莉奧（Ariel）以人類形態現身，準備來一場人魚之戀。
▲ 長髮公主樂佩（Rapunzel）一早起身吹靚個頭見人，小妹好想請教佢平時用邊隻風筒吹頭呢！
▲ 爛睡嘅睡公主（Aurora）都已經起身化好靚妝等待王子。
▲ 灰姑娘（Cinderella）同樣著咗對啱 size 帶又會甩嘅玻璃鞋趕到現場。
▲ 城堡旁仲豎立了一棵 8呎高嘅聖誕樹，樹上掛滿象徵每個公主故嘅閃耀掛飾，如南瓜、玫瑰花、小鹿等，分外搶眼！
夢想成真許願放天燈
要學做公主，梗係要練好體能，唔係點甩咗隻鞋都跑得快過王子！城堡內嘅互動遊戲「奔跑吧！灰姑娘」就以玻璃鞋嘅故事為藍本，俾大家練跑！要邂逅王子都需要點點運氣，你可以係「長髮公主天燈許願城堡」放個天燈，誠心許願，祈求王子從天而降呢！
▲ 長髮公主天燈許願城堡互動遊戲係免費參加，或者放個天燈王子就會從天而降呢！
▲ 只要係場內單一消費滿 $100 元,就可以參加「奔跑吧!灰姑娘互動遊戲」練跑，完成任務就可以得到限量版迪士尼公主 file 一個。
▲ 迪士尼公主 file 正反兩面係唔同嘅公主。
換購毛氈暖洋洋過冬
參加舞會要著得靚靚，但冬天咁凍，凍親點算呢？商場已經為大家準備好，只要係任何兩間不同商舖以電子貨幣消費滿 $3000，就可以換領「限量版白雪公主毛氈」一條，咁就可以過返個暖笠笠嘅冬天啦！而消費滿 $1000 就可以換領「限量版貝兒公主小手袋」，放晒啲化妝品入去就可以隨時補妝啦！
▲ 消費滿 $1000 就可以換領「限量版貝兒公主小手袋」，放晒啲化妝品入去就可以隨時補妝啦！
▲ 只要係任何兩間不同商舖以電子貨幣消費滿 $3000，就可以換領「限量版白雪公主毛氈」一條，咁就可以過返個暖笠笠嘅冬天啦！
日韓系公主精品做聖誕禮物
公主化嘅第一步當然要識得 shopping ，城堡內嘅 Pop-up store 有超過80款公主精品，而且大部份都係日韓系嘅設計，就算入迪士尼樂園都未必買到㗎！
▲ 雙面印花公主咕臣前面係公主嘜頭，後面係象徵嘅物件，都係 $90 咋！
▲ 呢個灰姑娘書形膠餐盒 $142，日本製造特別精美，不過唔知入唔入到微波爐呢？
▲ 公主磨砂玻璃杯 $158 高貴有氣派，就算係聖誕禮物都唔會太老土。
▲ 呢啲公主記事簿都係日本設計師設計，都只係 $40，如果去百貨公司買肯定唔係呢個價。
▲ 公主面膜 $26 暫時全香港得呢到有得賣，白雪公主係美白、小魚仙係補濕，睡公主係修復肌膚，你又想成為邊位公主呢？
依莉詩點評
呢幾年屯市嘅佈置都相當女性化，今次以迪士尼公主做主題更加迷到少女歡心。城堡嘅夢幻氣氛同聖誕好配合，每個真人大小嘅公主背後都有背景裝飾，企係隔離就可以瘋狂自拍，唔怕有攝石人出現。女神可以盡情影相 shopping，宅男們又可以搵個公主合照，小朋友又可以聽故仔，鍾意童話嘅朋友一定要去呢！
聖誕氣氛 ★★★★☆
必影指數 ★★★★☆
必買指數 ★★★☆☆
「Dream Big, Princess」裝置及期間限定店
日期：2016年 11月14日至 2017年1月2日 (上午10時至晚上10時)
地點：屯門市廣場一樓中央廣場
• 不想錯過新科技 ? 請 Follow unwire.hk FB 專頁 http://facebook.com/unwirehk/
The post 華麗城堡空降屯門市廣場！6 位公主出巡過聖誕 appeared first on UNWIRE.HK 玩生活‧樂科技.