整甜品要有技巧，造型更特別要講天份，近年 3D 打印技術愈來愈普及，第日可能個個都係甜品大師呢！最近硬蛋香港體驗館就擺放咗一部 3D 食物打印機，只要預先寄個 3D 設計圖檔去，就有專人免費幫你打印。我依莉詩今日就親身去試玩啦！
3D 曲奇交圖免費印
呢部 3D 食物打印機由台灣 XYZprinting 研發、設計及製造，只要輸入適當格式嘅 3D 設計圖 (.stl 檔案) 就可以打印 3D 曲奇、班戟等食物，一塊曲奇大約 20分鐘就可以打印完，咁手殘嘅朋友都可以係曲奇上面寫自己想要嘅字啦！想試試 3D食物打印機嘅成品，只要事先 send 定圖檔去 IngDan Coffee，就會有專用幫你整出嚟，仲可以係 IngDan Coffee 入面嘆曲奇，飲咖啡，而且係完全免費架！
▲ 呢部 3D 食物打印機大約兩部家用焗爐咁大，不過就只係負責印食物嘅形狀，粉漿都係要人手預備。
▲ 材料同平時整曲奇差不多，不過粉漿會比平時嘅「傑」一啲。
材料：
牛油…………100g
糖霜…………70g
蛋…………….1隻
麵粉…………150g
紫薯粉……..2湯匙
鹽…………….1/8茶匙
▲ 想整唔同顏色嘅曲奇可以加入不同嘅味粉，今次我就揀咗大熱嘅紫薯。
▲ 粉漿嘅做法同平時整曲奇一樣，首先將室暖嘅牛油加入糖霜打至軟身，之後加入多、麵粉、鹽及紫薯粉攪拌。
▲ 粉漿唔可以攪太耐，比平時嘅「杰」一啲。
▲ 之後將粉漿放入墨筒。
▲ 然後選擇要印嘅圖案。
▲ 粉漿會用 3D打印機嘅原理一層一層擠出。
▲ 一塊曲奇大約要 10-20分鐘先印製完成。
▲ 印好嘅曲奇會有明顯一條條嘅紋理，比起手造嘅仔細。
▲ 放入焗爐爐完就可以食了！
免費 VR 體驗賽車刺激
除咗 IngDan Coffee ，接近 6000呎嘅硬蛋香港體驗館有 10個主題區，展示不同嘅最新科技，航拍機、平衡車、智能機械人、VR 虛擬實景裝置、3D打印都有，當中 大部份產品都有得免費試玩，工作人員會講解產品運作原理，大人小朋友都可以從體驗中學習科技知識，係一個親子好去處呢！
▲ 戴上VR眼鏡就可以變成賽車手，同 19名虛擬車手一較高下，仿如置身賽事現場。
▲ 坐上大型蛋殼及戴上VR 眼鏡就可以玩不同遊戲。蛋殼會配合影像左搖右擺、上斜、下墜、旋轉，十分刺激！
▲ 除咗過山車，仲有射擊遊戲、G-Force 等十多款遊戲，玩幾多次都唔會悶！
▲ 仲有平衡車試玩添！
▲ 呢度不定期會搞工作坊，會教小朋友利用 3D打印機，創造出獨一無二嘅小擺設。
依莉詩：「有得嘆有得玩，只係遠咗少少！」
呢間體驗館集合咗好多不同類型嘅科技產品，而且大部份都有得免費試玩，無論對小朋友定大朋友都可以係一個樂園。加咗呢部食物打印機後，仲有得邊食自家設計嘅曲奇，邊嘆咖啡，日落時分景色仲一流添！不過係數碼港真係有啲遠，就算係免費都唔會成日去呢！
▲ 日落時分係到嘆咖啡真係一大享受呢！
硬蛋香港體驗館
開放時間：逢星期一至五:上午 10 時至下午 5 時 (星期六不定期開放、星期日及公眾假期休息)
地址：香港數碼港道 100 號 3 座 F 區 8 樓 811-813 室
查詢電話：2866 0020
• 不想錯過新科技 ? 請 Follow unwire.hk FB 專頁 http://facebook.com/unwirehk/The post 免費印自家設計曲奇！依莉詩試玩 3D 食物打印機 appeared first on UNWIRE.HK 玩生活‧樂科技.