最近澳門多間大型酒店開幕，今日就輪到按巴黎鐵塔真身 1:2 比例興建的巴黎人酒店亮燈了！注目的唔止細版鐵塔，內裡充滿凡爾賽浮誇裝潢，就等我依莉詩帶大家觀觀下啦！
1) 燈光 show 盡顯醉人夜色
起初聽到呢個 1:2比例的巴黎鐵塔，不禁會問，世界之窗一早有，點解仲要整多個係澳門呢？不過睇過夜晚的鐵塔景色之後，就知道感覺完全唔同。鐵塔的燈色不繼轉變，每 15分鐘仲會有燈光音樂表演，配合酒店同旁邊賭城區的璀璨燈光，散發陣陣醉人魅力。不過因為塔下的花園並無戰神廣場咁大，想搵個靚位做鐵塔下的戀人都幾難。
▲ 夜晚的鐵塔配合酒店的璀璨燈光，比正版少了分浪漫，多了分繁華。
▲ 可惜塔下的花園不大，想搵個靚位做鐵塔下的戀人都幾難，要影晒全景，可能要去對面酒店了。
2) 真 ‧ 巴黎鐵塔歷史長廊
想登上塔頂要先從 5樓鐵塔禮品店進入，再經過巴黎鐵塔真身的歷史長廊先會到售票處。長廊掛滿一幅幅興建真塔時的相片，講述一個個的威水史。而酒店住客可以免費登上 7樓的觀景台，走過藝術橋，超近距離仰望鐵塔的宏偉。
▲ 鐵塔的入口並不易找，係鐵塔禮品店入面。
▲ 沿歷史長廊上到 6樓平台，四周都係特色的佈置，可以打打卡。
▲ 單單係呢塊巨型銅牆牌已經夠影數百張自拍了。
▲ 7樓接駁鐵塔的藝術橋仿傚法國愛情鎖橋，可以將愛情鎖掛上去，不過因為初初開幕，沒有太多愛情鎖，唔講真係唔知係愛情鎖橋。
▲ 7樣平台可以超近距離仰望鐵塔的宏偉。
3) 30秒登上觀景台俯瞰賭城區
走過藝術橘，搭玻璃升降機唔駛 30秒就可以登上 37樓塔尖。由於呢個塔比真身細一半，所以上到去睇的景色並唔多，如果想睇日落會失望更幾乎完全被酒店主樓遮擋，要俾 MOP168 睇路氹的景色，其實都幾肉痛。
▲ 搭玻璃升降機唔駛 30秒就可以登上 37樓塔尖。
▲ 從 37 樓望落去可以睇晒酒店的全貌。
▲ 不過對面的風景被酒店主樓完全擋住了。
▲ 另外亦可以望到路氹大道、威尼斯人和新濠影滙等賭城區的建築，不過望到更多的是爛地地盤。
▲ 觀景台四面用鐵欄圍住，空間不大，如果多人可能會幾逼。
▲ 返落鐵塔禮品店可以買多款「到止一遊」的手信，唔知大家屋企有幾多個巴黎鐵塔的擺設呢？
▲ 法國風的旋轉木馬似乎更有特色啊！
4) Q立方王國坐鐵塔下的旋轉木馬
巴黎鐵塔下又點少得旋轉木馬，係 6樓 Q立方王國入面就有座小朋友版旋轉木馬，歐洲式的設計，同巴黎鐵塔合照同樣浪漫。係呢個近 2,000平方米的室內及室外遊樂區仲有波波池、攀爬架、氣墊曲棍球等，帶小朋友放電之餘，又可以影靚相，一個成人帶一個小童首兩小時都係 MOP120 (平日)、MOP150 (週末)，帶小朋友渡假的不錯選擇呢！
▲ 呢個太空艙攀爬架都幾有挑戰性，連我都玩唔停呢！
▲ 入面仲有波波池，雖然波唔算多，但對小朋友已經好夠。
5) 水世界
水上樂園幾乎係所有酒店必備的設施，而巴黎人除咗酒店住客專用的泳池，仲有呢個水上主題公園，入面的 3層樓高的滑水梯彎多又急，超級刺激，而旁邊儒勒·凡爾納飛船中間的熱氣球吊籃更會不定時倒水，隨時中招！雖然設施唔算多，不過大人細路都啱玩，MOP160 可以玩足全日都算係咁。
▲ 儒勒·凡爾納飛船以19世紀法國冒險小說家 Jules Verne 的作品為藍本，難怪咁有法國的味道。
▲ 呢條透明滑水梯有 3層樓高，平瞓衝落去速度超快，刺激到唔感打開眼呢！
6) 親民價套房鐵塔陪瞓
澳門的酒店出名貴，而巴黎人因為新開，價位最親民又見到鐵塔的房「艾菲爾」都係 MOP1,598。一打開窗簾就可以見到鐵塔，夢都發得甜 D！
▲酒店有近 3,000間客房及套房，共有 11種類型，不同房間都有巴黎鐵塔做裝飾，一應就知去咗邊間酒店。
▲ 牆上掛了一幅鐵塔的畫，就算房間見不到鐵塔亦不重要了。
▲洗手間相當寬敞，浴缸同淋浴間分開，玩要一日可以浸番個泡泡浴。
▲ 房內的插頭有埋 USB 同 HDMI，相當齊全。
▲ 住客專用的泳池充滿歐洲風格，可以邊浸邊欣賞巴黎鐵塔同紅磨坊風車，如果有幾個法國靚女行過就更好了！
▲ 至於健身中心全天候24小時開放，想幾時去做 gym 都得，爆完汗再沖過身就成身爽晒。
依莉詩：「澳門內的小巴黎」
談玩樂設施其實澳門間間酒店都差唔多，不過睇得出巴黎人係設計上花了不少心思，極盡營造出一個巴黎的寧願浪漫氣氛。當中的巴黎鐵塔模製得幾可亂真，而酒店大堂亦好有氣派，去開澳門一定要打下卡啊！
• 不想錯過新科技 ? 請 Follow unwire.hk FB 專頁 http://facebook.com/unwirehk/
The post 【澳門巴黎人】有如凡爾賽浮誇 鐵塔6大必行影相位 appeared first on UNWIRE.HK 玩生活‧樂科技.